Niderlandda 2026-cı ildə müsəlmanlar üçün çox sayda yeni ibtidai məktəblər açılacaq.
Qafqazagency.ir xəbər verir ki, növbəti il istifadəyə veriləcək 14 yeni ibtidai məktəbin 9-u müsəlman məktəbi olacaq.
Sözügedən məktəblərin açılması və maliyyələşdirilməsi ölkənin Təhsil Nazirliyi tərəfindən təsdiqlənib.
Dini təmayüllü məktəblərin açılmasında müşahidə edilən artım bu cür təhsil müəssisələrinin açılması prosesini sadələşdirən yeni qanunla bağlıdır. Əvvəllər dini icmalar bələdiyyə ərazisinda ilk məktəblərini açmaq üçün mürəkkəb prosedurdan keçməli idi. İndi isə həmin icmaların 200 valideynin ərizəsi ilə müraciət etməsi kifayətdir.
Qeyd edək, Niderlandda müsəlmanlara məxsus məktəblərin sayı artmaqdadır. Araşdırmalar göstərir ki, son üç ildə açılmış hər 3-cü məktəb müsəlman icmalarına məxsusdur. Əgər 2026-cı ildə nəzərdə tutulan 9 müsəlman məktəbinin hamısı istifadəyə verilsə, o zaman ölkədəki müsəlman məktəblərinin sayı təxminən 100 olacaq. Müqayisə üçün deyək ki, ölkədə təxminən 1800 protestant xristian məktəbi, təxminən bir o qədr də katolik məktəbi var.
Ölkədə dini inanclı şəxslərin sayının uzun illərdir ki, azalmasının fonunda yeni dini məktəblərin sayında artım var. Niderlandın müsəlman icmasının sayı isə sürətlə dayanmadan çoxalmaqdadır.
