Həbsdə olan jurnalist Polad Aslanov 19 gündür aclıq edir.
Qafqazagency.ir xəbər verir ki, Həyat yoldaşı Gülmirə Aslanova “Facebook” səhifəsində bildirib ki, sentyabrın 15-də saxlanıldığı 15 saylı Cəzaçəkmə Müəssisəsində aclıq edəndən bəri ilk dəfə Aslanovun çəkisini ölçməyə çalışıblar.
“Polad Aslanovun çəkisini yoxlamaq üçün xarab tərəzi gətiriblər.Tərəzinin xarab olduğunu özləri də etiraf ediblər. Polad 4 dəfə tərəziyə çıxıb. Xarab tərəzi hər dəfə onun çəkisini fərqli göstərib: 65, 52, 45, 43 kiloqram”, – Aslanova qeyd edib.
O bildirib ki, sonda həyat yoldaşının çəkisini paltarla birlikdə 52 kiloqram qeyd ediblər.
Aslanova əlavə edib ki, jurnalist aclıq etdiyi üçün çox üşüyür və hazırda əynində qış geyimi və qalın gödəkçə var.
“Təzyiqi isə 110/70-ə olub. Hələ də qida qəbul edən məhbuslardan təcrid olunmayıb”, – o vurğulayıb.
P.Aslanov bildirib ki, tələbləri icra olunana kimi aclıq aksiyasını davam etdirəcək.
Jurnalist avqustun 29-da aclıq aksiyasına başlayıb.
Buna səbəb P.Aslanovun saxlanıldığı 15 saylı Cəzaçəkmə Müəssisəsinin tibb məntəqəsindəki mətbəxdən istifadəsinə icazə verilməməsidir.
Aslanovanın sözlərinə görə, həyat yoldaşı iyulun 18-də keçdiyi ultrasəs müayinəsinin nəticəsini tələb edir. Cəzaçəkmə müəssisəsinin tibb məntəqəsinin Cavanşir adlı baş həkimi isə P.Aslanovun etirazına cavab olaraq onun mətbəxdən istifadəsinə qadağa qoyub.
Aslanova ultrasəs nəticələrinin gizlədilməsini məqsədyönlü hesab edir: “Polad Aslanovun sağlamlığı ilə oynayırlar. Cavabı gecikdirməklə qaraciyərindəki problemin dərinləşməsini gözləyirlər”, – o deyib.
Aslanova, həmçinin, Ombudsmana müraciət etdiklərini, qurumun isə şikayəti Ədliyyə Nazirliyinin Tibb Baş İdarəsinə göndərdiyini deyib. Cavab məktubunda Aslanovun 2020-ci ildə “praktiki sağlam” kimi qeydiyyata alındığı göstərilib.
Polad Aslanov 2019-cu ildə casusluq ittihamı ilə həbs olunub. O, ittihamları rədd edir və hökumətdə korrupsiya faktlarını ifşa etdiyinə görə təqib olunduğunu bildirir.
Hüquq müdafiəçiləri Aslanovu siyasi məhbus sayır. Avropa İnsan Hüquqları Məhkəməsi də onun həbsi ilə bağlı Azərbaycana qarşı qərar çıxarıb.
